الفِجّة 

عثمان يوسف خليل

كل ما أدوّر في رويسي الكبير ده وافتش في دواخله عشان ألقى لي كلمتين ترضيكم اصله إنتو متعبين بالحيل وكايسين لأي شي من لخبتات أهلي.. بس يا جماعة لازم تعرفوا إنه الناس ديل عندهم دنياهم دي حقتهم براهم وما دايرين من زول حاجة إلا الاحترام وتسمعو حديسن وما تشنفوهم سمح..

أهلي ديل زي باقي الناس حابين كل شي بخسهم، ياخي ديل من شدة حرصهم عليها وعلى تفاصيلها ريحة الزبالة العفنة دي عندهم زي عطور باريس الجميلة..

العجيب في الأمر يا جماعة إنه أهلي ديل عندهم كلمات وتعابير قاطعنها من روسينهم المدوقسة ديك والعاملة زي التقول قاقونة وإنتو يا ناس ندى ترى أوعاكم تسعلوني من قاقونه دي معناها شنو لأني أنا زاتي ما عارف..

أها يا جماعة الله داير أقول ليكم إنه هناك، وهناك دي في حِلتنا مش حَلتنا بفتح الحاء أصلكم جحمانين نحم (الترجمة لحم للناطقين بغيرها) وسحوته، قول يا زول من الكلمات المتداولة كثيرًا في لهجة أهل الجزيرة (شيلتك)، وقد لعب بها أهلنا كما يلعب أطفالهم بشليل (شايف شليل ده جا ناطي كيف وبدون إحم كمان) فهل يا ترى شليل الشقي ده ليه أي علاقة بالشيل، ياخي اشيلو تمساح ابكبلو اريحنا منه..

أها عوداً لموضوع شيلتك دي الكانت بتخوفنا خوف لمن الواحد (إتعيب) ولو لا وجود أطفال ونسوان المعنى كنت فسرت حديسي لكن خلوها في حالها، والكلام ده وهو أصلاً وعيد لمن هو بليد زي حالاتنا زمان لم تقوم تلقى في كراسك كلمة قابلني!! اها ياتارك الصلاة اتيمم للدق أو شيل شيلتك..

لكن يا جماعه الله لا وراكم الإرهاب الأكبر، وهنا لم تعمل غلط في البيت، لا حولا، تقوم أمك الرحيمة تفرحك بكلمتين حلوات (شيل شيلتك) وتفرحك دي فهمتوها طبعاً، لو اصله في فرحة مع أبو جيقة داك صاحب أكبر قوة من الردع والردم، ويا ويلك لو كان جاي من الخلا في نصت نهار وهجير يدوب السحلية، وعلى كده يوم طويل وتقوم امك المره المغلوبه على امرها تدي بعلها الغلت الليلك، لا حولا!!غايتو الحاج بفش فيك غباينه القديمه والجديده..وامك تقوم تحنس فيه، وهاك يا انكسار من نوع يا حاج الرسول في إيدك، والنبي كفاه، طيب يا حاجة من اصله الشلاقة العليك شنو ما كان تقومي إنتي بالواجب..

أها أبردو إنتو أصلو كل الحديس الفوق ده عشان نشرحلكم المعنى حق (شيل شيلتك)

بس خلو بالكم الموضوع ما انتهى وأوع تكونو شلتو شيلتكم؟.. نواصل،،،

المملكة المتحدة