نصوص .. ساب البلد دي
وئام كمال
لا حمى لا أرو
لا شغلاًَ كجّرو
(يمة هوي ساب البلد دي)
أطبا كان قرو
كان قلبي جبّرو
(يمة هوي ساب البلد دي)
قليبي بتعرفه
المطرة في الصفا
(يمة هوي ساب البلد دي)
من غدرك انكفى
خصمتو وما عفى
(يمة هوي ساب البلد دي)
حرابة العزول
الوشم المابزول
(يمة هوي ساب البلد دي)
كان بينضم المكتول
كان بحكي ليك وأقول
(يمة هوي ساب البلد دي)
نزوحاً ما كضب
حريقا في العصب
(يمة هوي ساب البلد دي)
شن دمعي كان قِرب
فوق نارك أم حطب
(يمة هوي ساب البلد دي)
دريدم الكعكول
الفي الخشم مبلول
(يمة هوي ساب البلد دي)
ككيف تفوت يازول
واللهي مامعقول
شرّاك النشابة
ده السنّ الحُرابة
(يمة هوي ساب البلد دي)
وإن قلتو نتشابى
كان سوبا وخرابا
فات الديار سابا
وانقلب خرابة
(يمة هوي ساب البلد دي)
قليبي من صابا
شال نومي بجرابه
عاود تعال يابا
والبين ماحبابه
(يمة هوي ساب البلد دي)
الفارق أحبابا
في خشما الترابة
البين الانكتب
والمبني الانخرب
(يمة هوي ساب البلد دي)
كان بفتحو العلب
في الصافية لي طلب
(كان بفتحو العلب
بلقوك خاتم دهب)
اللوري تا ترا
ومكنتا الدورا
(يمة هوي ساب البلد دي)
عقلي الجرا وبِرا
أداني الجن ورا
(يمة هوي ساب البلد دي)
طيفك غشاني زار
كان يخلس النهار
(يمة هوي ساب البلد دي)
حساب ومو كوار
نص يوم عليا حار
(يمة هوي ساب البلد دي)
سحابا خمّل شال
غرّب علي الجُبال
(يمة هوي ساب البلد دي)
سبلة بكاي السال
ككيف بْكا الجهال
قول للرفع تمام
يابا الحرب حرام
(يمة هوي ساب البلد دي)
بنغني للسلام
طالباك كم سلام
بنغني وننطرب
للودر الدرب
(يمة هوي ساب البلد دي)
ونعمر الخرب
كان وقفت الحرب
